1. ESTUDOS - Programa Mocidades de TEGA - Municipais´07

Dende as xuventudes de Terra Galega consideramos que a formación é o mellor investimento público que unha sociedade pode ofrecer aos seus cidadáns. Tendo ben definida a diferenza entre formación e inculcación de valores (estes últimos son responsabilidade da familia) cremos que as institucións públicas teñen que traballar constantemente por mellorar o noso sistema educativo, optimizando os recursos dispoñibles, adaptándoo ás novas necesidades e problemáticas sociais e abrindo o maior número de titulacións posibles para que os nosos alumnos poidan levar a cabo a súa formación até a fin en Galicia.

Propoñemos as seguintes medidas:

- Combater o acoso escolar e actuar coa máxima enerxía nos casos reiterados.

- Nos ciclos formativos dar a oportunidade aos alumnos de pasar dun Ciclo Medio a un Superior mediante a superación duns complementos de formación ou dun curso ponte.

- Traballar para mellorar a calidade do ensino secundario, especialmente os Ciclos Formativos co obxectivo de reducir os índices de fracaso escolar adaptándoos no posible a os sectores estratéxicos e a realidade empresarial.

- Racionalizar a oferta de estudos universitarios e secundarios, ampliándoa aí onde fora necesario e evitando o solapamento de titulacións entre os diferentes campus galegos.

- Ampliar a rede de titores e orientadores laborais e universitarios no bacharelato.


Desde as Mocidades de Terra Galega partimos do feito de que non é o mesmo:

A formación, o ensino, a educación ou a dotación de coñecementos que a inculcación de valores de carácter tanto ético, cívico, solidario ou de respecto cara ao noso próximo.

Consideramos que a formación dun neno/a é e debe de seguir sendo responsabilidade do sistema educativo público, é dicir, da Administración competente en tal área.

Agora ben, do mesmo xeito consideramos que a inculcación dos valores expostos anteriormente deben de ser fundamentalmente responsabilidade dos pais dos nenos ou ben, no seu defecto das persoas que os críen, debendo de actuar o sistema educativo neste apartado como un reforzo complementario á labor dos pais.

2. PRIMEIRO EMPREGO - Programa Mocidades de TEGA - Municipais´07

A encaixe da xuventude galega no mercado laboral é un dos grandes desafíos que a día de hoxe hai en no noso país. Se é importante asegurar un ensino de calidade para a xuventude, éo igualmente conseguir que ese capital humano poida desenvolver os seus coñecementos e as súas capacidades en Galicia. O fenómeno da emigración masiva de titulados universitarios, típico dos nosos días, supón unha dobre lacra para a nosa sociedade porque perde poboación pero a maiores perde un valor engadido que foi creado en Galicia e que rende fóra do noso territorio.

O goberno galego ten que facilitar axudas para que os nosos xoves poidan acceder a un emprego digno sen que iso supoña crear unha rede de mecanismos de control clientelar. Hai que conxugar os mecanismos de política fiscal de que dispoñemos coa existencia de organismos autónomos como o IGAPE para fomentar a creación de novas empresas; por outra banda, hai que propor un gran pacto nacional polo emprego xuvenil entre empresarios e as universidades galegas para acadar o obxectivo da plena ocupación.

Finalmente, é igualmente importante que o traballo que desenvolven os nosos mozos sexa de calidade, que lles permita poder autorealizarse e que cumpra todas as condicións de seguridade necesarias; hai que declarar a guerra ao fenómeno da sinistralidade laboral cada día máis presente.

Dende as xuventudes de Terra Galega propoñemos:


- Levar a cabo unha política transversal de axuda aos emprendedores coas seguintes medidas:
i. Estudos mercado; creación de novas especialidades de acordo coa demanda existente en cada momento

ii. Créditos do IGAPE
iii. Viveiros de empresas
iv. Exencións fiscais
v. Mecanismos de delimitación do campo laboral segundo a titulación superada.

- Fomentar os convenios entre as universidades, ciclos formativos e empresas para facilitar o 1º emprego.

- Promoción de axudas para evitar a fuga de capital humano de Galicia.(sobre todo de cerebros)

- Intento de convenios empresariais para fomentar a inserción de persoas discapacitadas

3. CALIDADE DO EMPREGO - Programa Mocidades de TEGA - Municipais´07

- Aumento do salario mínimo ata converxer co da UE-15 de aquí a dez anos

- Fomento do emprego cualificado a partir de programas de reciclaxe e de formación continua.

- Creación dun verdadeiro servizo de inspección laboral que controle o cumprimento dos convenios

4. VIVENDA - Programa Mocidades de TEGA - Municipais´07

- Dende as Xuventudes de Terra Galega propoñemos o Fomento do aluguer de promoción pública. Isto asegúrase aplicando políticas que promovan o abaratamento dos terreos e os prezos dos alugueiros. Para iso propoñemos un gran pacto nacional entre a FEGAMP e a administración autonómica consistente en outorgar en todos os Plans Xerais de Ordenación Municipal un cociente fixo de solo edificable que permita intervir directamente no mecanismo do mercado.

- Penalizar fiscalmente a compra de vivendas con fines especulativos.

5. FILLOS - Programa Mocidades de TEGA - Municipais´07

Galicia é unha das sociedades máis envellecidas do mundo. A actual pirámide demográfica unida ao baixo volume de inmigración actual imposibilita o mantemento dun sistema autónomo de prestacións sociais sen depender das transferencias externas. Dende as xuventudes de Terra Galega cremos que cómpre apostar abertamente por unha política de protección á familia que rache coa actual situación en que un fillo é un artigo de luxo que hai que pagar. Hai que reverter a actual situación en que España é o Estado da Unión Europea que menos axudas públicas ofrece por fillo.

Propoñemos as seguintes medidas:

- Consagrar como un dereito universal os comedores escolares.

- Facilitar a todos os nenos dende o seu nacemento o acceso a unha escola infantil pública, así como facilitar a súa creación en parques empresariais,ou en agrupacións de pequenas empresas.

- Fomentar unha nova mentalidade que permita conciliar a vida laboral coa familiar mediante campañas de concienciación institucionais

6. SAUDE - Programa Mocidades de TEGA - Municipais´07

A asunción das competencias de sanidade por parte da Xunta de Galicia supuxo un despregue sen precedentes da nosa administración autonómica por todo o país. A día de hoxe, sanidade é a partida que maiores gastos supón para os orzamentos da Xunta, o cal dá unha idea da súa importancia a nivel galego.

Avogamos por unha sanidade pública e universal que poida atender en condicións a todos os cidadáns do noso país, loitando contra as listas de espera e estendendo a rede de Puntos de Atención Continuada (PAC) polas nosas vilas.

Consideramos que a día de hoxe existen novas doenzas provocadas por determinados condicionamentos sociais, como son a anorexia e a bulimia cuxo tratamento ten que ser potenciado nos hospitais públicos. Por outra banda, hai que potenciar as campañas de prevención contra a obesidade como mellor maneira de asegurar unha maior calidade de vida no futuro.

Propoñemos:

- Potenciar nas escolas o servizo psicolóxico e psicopedagóxico.

- Potenciar os servizos de tratamento de enfermidades esencialmente psicolóxicas como a anorexia ou a bulimia dos hospitais públicos.

- Creación entre os máis novos de campañas institucionais de concienciación ante estas doenzas.

- Asesoramento e información aos pais dos nenos sobre unha alimentación correcta para os seus fillos.

7. DROGADICCIÓN / ALCOHOLEMIA - Programa Mocidades de TEGA - Municipais´07

Nas xuventudes de Terra Galega partimos da base que o individuo é autónomo e responsable por si mesmo; rexeitamos as posturas paternalistas que as administracións públicas empregan coa temática das drogas. É preciso empregar a pedagoxía e ofrecer aos nosos xoves un coñecemento amplo dos efectos das sustancias.

Nas xuventudes de Terra Galega avogamos por:

- Partir do principio da liberdade e da responsabilidade individual.

- Eliminar toda lexislación autonómica ou ordenanza local que restrinxa o consumo de alcohol na vía pública nos maiores de 18 anos.

- Introducir programas de información no ensino secundario que expliquen os compoñentes tóxicos das drogas e que expliquen as consecuencias dunha adición; insistir no concepto de responsabilidade individual.(tendo reunións con xente que o sufriu e as consecuencias que tivo na sociedade que o rodea).

- Facer unha política continua de controis rigorosos nos distribuidores e subministradores de bebidas alcohólicas así como nos locais nocturnos contra á venda de alcol adulterado.
Programas de desintoxicación e reinserción para drogodependentes cunha rede pública de centros especializados

8. SEXUALIDADE- Programa Mocidades de TEGA - Municipais´07

Cremos que dende as institucións públicas hai que afrontar a educación sexual dende unha óptica o máis aberta posible e fuxindo de ningún tipo de prexuízo moralista. É importante incidir na información aos nosos xoves dende os institutos e centros de planificación familiar gratuítos para previr embarazos non desexados e enfermidades de transmisión sexual, posto que é alarmante o número de embarazos non desexados entre menores de idade que acontecen, sobre todo, por unha información deficiente ou descoñecemento dos métodos anticonceptivos.

- Programas de información sobre sexualidade no ensino secundario sobre temas como o embarazo non desexado,enfermidades de transmisión sexual, métodos preventivos.

- Rede asistencial de planificación familiar gratuíta, universal e accesible.

9. SEGURIDADE VIAL- Programa Mocidades de TEGA - Municipais´07

É esencial afrontar a instrución dos futuros condutores como ferramenta básica non só para evitar accidentes de tráfico, senón tamén para formar persoas cívicas e respectuosas co seu entorno; da mesma maneira, hai que conxugar e formación coa máxima contundencia cos infractores reincidentes.

Dende as xuventudes de Terra Galega propoñemos:

- Radares nos puntos negros non so con afán recadatorio.

- Fomento da educación vial, clases didácticas coas persoas que sufriron en primeira persoa accidentes de tráfico: adquirir concienciación e aprecio pola vida desde novos.

- Pistas de automobilismo de carácter deportivo e didáctico.

- Nas infraccións cometidas pola xente nova trocar parcialmente as sancións económicas por traballos de carácter social á comunidade.

10. TRANSPORTE- Programa Mocidades de TEGA - Municipais´07

A secular situación de Galicia como fisterra europea ten un condicionamento xeográfico pero ten en moita maior medida un condicionamento político. O illamento de Galicia como centro de poder político dende finais da Idade Media provocou que os accesos ao noso país dende o exterior fosen deficientes e que as comunicacións interiores seguisen a mesma pauta. Se Galicia non quere perder o tren da globalización hai que investir en transportes e asegurar un acceso dende calquera extremo de Galicia ao eixo atlántico en menos de dúas horas, así como redes de transporte público áxiles nos nosos concellos, tanto nas grandes cidades (Vigo e A Coruña) como nos concellos rurais.

- Fomentar o uso da bicicleta creando carrís/bici nas nosas poboacións.

- Apostar polo transporte público como alternativa.

- Os concellos deben apostar por crear liñas de autobuses que percorran as diferentes parroquias e núcleos do seu territorio e resumen poñer en relación o transporte público coa expansión das áreas metropolitanas

- Finalización inmediata do Eixo atlántico ferroviario e da conexión de Alta Velocidade Lubián - Ourense en 2010.

- Creación dunha empresa pública de Camiños de Ferro en Galicia que asuma as actuais liñas de RENFE e FEVE en Galicia e que traballe para crear redes de cercanías naqueles núcleos importantes que non a teñen.

- Axilizar os proxectos de metro para as cidades de Vigo e A Coruña e de tranvías no resto das cidades galegas.Tamén tratar de enlazar a rede vial cun metro de superficie

11. OFERTA CULTURAL/DEPORTES - Programa Mocidades de TEGA - Municipais´07

De pouco serve unha formación de calidade se logo non facilitamos un acceso aberto e gratuíto dos nosos cidadáns ás actividades culturais; os concellos e administracións públicas teñen que apostar, dende as súas posibilidades, por facilitar o acceso dos xoves galegos ás mesmas. Do mesmo xeito, hai que aplicar o principio de mens sana in corpore sano e fomentar a práctica do deporte entre os nosos xoves como investimento de futuro e hábito saudable.

Propoñemos:

- Programas de TV para a xente nova en horario infantil.

- Valorar a práctica do deporte como sinónimo de vida san, e implicar ás diferentes institucións galegas para investir en pavillóns, campos de atletismo, equipas escolares...

- Rede de bibliotecas de promoción autonómica con servizos de videoteca con material de interese cultural dificilmente asumible polos medios comerciais

- Fomento e revalorización da cultura tradicional facendo atractiva para as novas xeracións co fin de garantir a súa pervivencia.

12. LÍNGUA - Programa Mocidades de TEGA - Municipais´07

A histórica situación do idioma galego como lingua periférica e a política de xenocidio cultural contra o galego practicada polo réxime franquista xeraron unha situación na que empregar o idioma galego era un atranco para ascender na escala social. Coa chegada da autonomía houbo cambios de xeito parcial nas novas institucións galegas, mais na administración do Estado en Galicia, no Poder Xudicial, en varias Deputacións Provinciais e en moitos dos concellos persistiu o tratamento diglósico cara ao galego. Todo elo ten contribuído a que a día de hoxe o galego estea considerado pola UNESCO como idioma en risco de desaparición de non se reverter a actual tendencia de perda de falantes nas xeracións máis novas.

O galego é hoxe un idioma que ten a capacidade de ser o medio de comunicación de máis de 200 millóns de persoas espalladas por todo o mundo. Se aceptamos de maneira obxectiva a opinión de diversos lingüistas de difusión internacional chegamos á conclusión de que o galego é un idioma inserido no sistema lingüístico da lusofonía e que, polo tanto, é unha ponte privilexiada para a rápida aprendizaxe do patrón portugués culto, o que nós dá a posibilidade de sermos unha nación que pode ter contacto lingüístico con máis de 600 millóns de persoas mediante o coñecemento do galego e do español e coa práctica totalidade da poboación mundial se a esas lle engadimos a aprendizaxe do inglés.

Dende a nosa organización, avogamos por:

- Asegurar o cumprimento da lexislación lingüística vixente en materia de ensino e suprimir, se é necesario, os concertos a aquelas escolas e institutos que a sigan a incumprir.

- Co obxectivo de asegurarmos unha verdadeira igualdade legal dende o eido lingüístico para a poboación galegofalante, reclamamos a obrigatoriedade de coñecer o idioma galego para todos os cidadáns de Galicia.

- A total galeguización dos documentos administrativos dos concellos que conten con alcalde do noso partido.

13.MEDIO AMBIENTE - Programa Mocidades de TEGA - Municipais´07

As xuventudes de Terra Galega apostamos por un desenvolvemento sostible que permita manter o noso ecosistema e diversidade de flora e fauna porque iso é un valor en si mesmo. Fuxindo de previsións catastrofistas, vemos con preocupación o aumento de CO2 na atmosfera e o crecente nivel de contaminación.

En Galicia sufrimos durante os últimos anos grandes catástrofes contra o noso ecosistema. O tristemente célebre afundimento do Prestige e a vaga de lumes do verán de 2006 evidenciaron a falla de preparación das administracións ante situacións de emerxencia.

Como medidas encamiñadas a manter o noso medio ambiente, propoñemos:


- O cumprimento do principio de que, quen contamina, paga. Máis inspeccións contra as empresas contaminantes.

- Saneamento integral de todas as rías e ríos de Galicia.

- Levar a cabo a plena implantación de transporte urbano menos contaminante en todos os concellos e áreas urbanas de Galicia.

- Implantación de enerxías renovables nos edificios de carácter público e institucional.

- Declarar a Galicia zona desnuclearizada.